Diaspora shqiptare me paraqitje dinjitoze në një nga arenat më të mëdha sportive në botë
Në Chicago, para ndeshjes së Chicago Bulls, kultura shqiptare u prezantua në mënyrë dinjitoze në parketin e NBA-së. Të rinj me veshje kombëtare sollën valle dhe elemente të traditës shqiptare, duke tërhequr vëmendjen e publikut amerikan dhe komunitetit shqiptar në Illinois.
Për TV Syri u prononcuan Fuad dhe Minire Kelmendi, Safet dhe Merita Krasniqi, si edhe Adnan dhe Arta Zenullahi, prindërit e vajzës së tyre Irena, e cila mori pjesë në performancën e vallëzimit.
Fuad Kelmendi e vlerësoi momentin si një paraqitje të rëndësishme të kulturës shqiptare në një skenë ndërkombëtare:
“Ishte një emocion i veçantë. Të shohësh vallet tona në një arenë të NBA-së është një ndjenjë që të mbush me krenari.”
Minire Kelmendi theksoi atmosferën e ngrohtë dhe pritjen pozitive të publikut:
“Kur u dëgjua muzika shqiptare në United Center, u krijua një emocion i jashtëzakonshëm. Ishte një prezantim shumë i denjë i kulturës sonë.”
Safet Krasniqi u shpreh se bashkëpunimi me klubin amerikan është një sinjal i qartë i vlerësimit ndaj komunitetit shqiptar:
“Chicago Bulls tregoi respekt duke hapur hapësirë për kulturën tonë. Kjo tregon se komuniteti shqiptar ka vend të rëndësishëm në këtë qytet.”
Ndërsa Merita Krasniqi e cilësoi performancën si një përvojë të paharrueshme:
“Publiku e priti me shumë simpati. Ishte një moment i bukur dhe i organizuar në mënyrë profesionale.»
Adnan Zenullahi, prind i Irenës, u shpreh i emocionuar për pjesëmarrjen e vajzës së tij:
“Për ne ishte një krenari e madhe ta shihnim Irenën në këtë skenë. Është një përvojë që do ta mbajmë mend gjatë.”
Ndërsa Arta Zenullahi theksoi rëndësinë e ruajtjes së traditës:
“Të shohësh fëmijët tanë duke përfaqësuar kulturën shqiptare në një arenë të tillë është një ndjenjë e veçantë. Ishte një moment shumë i bukur për të gjithë komunitetin.»
Ngjarja u vlerësua si një prej paraqitjeve më të suksesshme të kulturës shqiptare në SHBA, duke treguar se diaspora shqiptare vazhdon të ruajë dhe promovojë identitetin e saj në skena të mëdha ndërkombëtare.
